எப்படியாவது இன்று
உனக்கு
ஒரு கவிதை எழுதி விட வேண்டும்
என்று தவிக்கிறேன்
வார்த்தைகள் ஒன்றும்
கிடைக்காமலில்லை.
உனக்காக சிந்தித்து சிதறிய வார்த்தைகள் வீடு முழுதும்
குவிந்து கிடக்கின்றன,
மிகவும் கவனமாக நடக்கிறேன்
நல்ல வார்த்தைகள்
நொறுங்கி விடக் கூடாதென.
பொம்மை கடைக்குள் நுழைந்த குழந்தை அங்கிருக்கும்
அனைத்து பொம்மைகளையும் தொட்டுப்பார்த்து
சில பொம்மைகளை
தேர்ந்தெடுப்பது போல்.
வார்த்தைகளுக்கு வலிக்காமல்
சில வார்த்தைகளை
சேகரித்திருக்கிறேன்.
நம் காதலின் கதகதப்பில் வருடங்கள் கணங்களாக கடந்துவிட்டன,
எனக்கு பேராசை எல்லாம் இல்லை என்னுடைய தேவைகள் மிகவும் குறைவானவையே,
காலையில் சூடான தேநீர்
மதியம் ஒரு பிடி சாதம்
மாலையில் கொஞ்சம் பழங்கள்
இரவினில்
உன் சுவாசத்தின் வாசம்,
இப்போது
உன்
அருகாமையின்
அதிர்வு,
எப்போதும்
உன்
ஒரு துளி காதல்...
(இனிய திருமண நாள் நல்வாழ்த்துக்கள்)
No comments:
Post a Comment